Cronica de J. L Blénet dins Midi Libre .

L’avètz benlèu pas plan mesurat mas lo virus pertòca encara mai los avions que los umans.
Per nautres es plan michant pels ancians, mas pel demai es « a l’azard Bautezard ». Los avions eles cargan totes : tant los que vòlon que son clavats au sòu, coma los que son a fargar car la produccion n’es a la cala. Dau còp la Ciutat Mondina (pichòt nom de Tolosa) vei venir una crisi economica pebrada. Montèron una comission saberuda menada pel Joan Tirole per trapar cossí sortir de la marrana. Cau precisar qu’aquel Tirole es dau gròs grun en economia, pensatz, un prèmi Nobel, es complicat de far mai. Aquel cenacle sortiguèt un programa e 11 proposicions. Aquí, suspresa, espant : los elegits estabosits legisson que n’i a una qu’es « Jogar sus la natura e la cultura occitana ». Es un eveniment ! Non pas per çò qu’es dich que, pecaire, dempuèi decadas d’occitanistas va repeton (salut Robert Lafont). L’eveniment son los que lo dison ara. Lo menaire es de l’economia ortodòxa, e la còla es de la meteissa farina. Enfin se n’avisan ! Es pasmens simplòt de veire qu’una lenga, una cultura es patrimòni, es a dire l’actiu dau bilanç, la riquesa d’un país. Arroinar l’actiu es un biais segur de se roinar. Aquel monde de l’economia seriosa caminan. Òi, lo progrès progrèssa e l’avenidor se sarra.

J. L Blénet –  MIDILIBRE .

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*