La vidassa es una trista vida de patiments. Es d’aquel mot d’òc que lo soldat Bidasse tira son nom. L’actualitat balha una illustracion perfiècha de la vidassa de nòstra lenga e de sas collègas en malur d’aqueste país. Lo 25 de genièr lo ministèri cambièt los coeficients dels concors de professors de lengas regionalas (CAPES). Causa estranha doas categorias. Fins ara lo còrs comptava per 6,5 e lo francés per 5,5. Normau per recrutar de professors de còrs. Escambi de posicion : lo còrs baissa a 5,5 e lo francés monta a 6,5. Per las autras lengas es mai regde. Lo francés puja de 5,5 a 7,5 e l’occitan tomba de 6,5 a 4,5. Atal la matèira principala de competéncia dels professors ven plan minoritària, es fulgurant d’intelligenci ! Au passatge vesèm que la Republica d’Egalitat practica a l’aise la Discriminacion d’Estat. L’Express questionèt lo ministèri e ne tirèt aquò : primièr « se fa parièr per las lengas estrangièras ». Regal de l’argument. De segur lo nivèl prodigiós en lengas dels escolans franceses daissa la Planeta tota estabosida d’admiracion dabans aquel zenit de performanças pedagogicas. L’autra rason es la Constitucion que ditz « la lenga de la republica es lo francés » Alavetz perqué doncas ensenhar d’autras lengas? Amb lor engèni an trapada la solucion : las ensenhar mal.
J.L Blénet