Pel retorn de la musica occitana a l’antena de França Blau Occitania !
RECAMPAMENT DAVANT FRANÇA BLAU OCCITANIA LO 16 DE JUNH A 15H00
Aquesta sason radiofonica es a mand de s’acabar. Pel primièr còp dempuèi 2011, d’artistas d’expression occitana son pas pus difusats o pauc se’n manca a l’antena de França Blau Occitània e mai que mai dins l’emission Conta Monde. Sols los artistas que fan la promocion d’un novèl disc an lo dreit a la difusion d’un títol dins l’emission: aquò fa pas gaire e la programacion musicala propausada es pas pus en adequacion amb lo contengut del programa.
Cossí una ràdio regionala de servici public pòt envisatjar de difusar pas d’artistas locals e regionals que cantan en occitan ?
Cossí la direccion de Ràdio França pòt explicar que d’artistas d’expression occitana se retròban programats dins d’autras antenas de servici public coma FIP e non dins la de França Blau Occitània ?
Demandam a la direccion de Ràdio França e en particular a la de França Blau Occitània que los artistas d’expression occitana sián programats tornarmai dins l’antena regionala de servici public (es atal per exemple dins l’emission occitana »Meitat Chen, Meitat Pòrc » de França Blau Perigòrd).
Fin finala, esperam que la lenga e la cultura nòstras sián presas mai en consideracion a l’antena de França Blau Occitània.