La Passem 2022 una capitada !

La Passem : 600 km de corruts en relai, e ligams ahortits

Deu 2 au 5 de junh passats, de dia com de nueit, shens s’estancar pendent 600 km, lo ligam que’s passè de man en man capvath lo Sud Gasconha, a saber Lanas, Baish Ador, Bigòrra e Bearn, traucant atau 170 comunas.

A cada quilomètre pairinat a 100 € cadun, que’s mobilizè com jamei lo hialat associatiu entà trobar mecènas, estossen institucions, enterpresas, associacions, clubs esportius o simples particulars, tots estacats a la lenga e a la cultura nostas. Lo cabau crubat que servirà a finançar projèctes en favor de la lenga occitana suu territòri per on passè.

Animacions de las hòrt nombrosas que pigalhèn lo passatge de La Passem : concèrts, bals, cantèras, lecturas, jòcs e iniciativas autas entà dar a conéisher la lenga e cultura pròpias deu país. Qu’estó alavetz dab gran gaujor que petits com grans, esportius e mensh esportius e corrón shens nat estanc (quan seré au perhons de la nueit o devath la ploja o la peirabatuda !) a pè, a bicicleta, en chancas, a chivau o en trotineta !

Que’s hasó l’arribada a Pau, plaça Reiau, dimenge lo 5 de junh on lo messatge secret esconut au còr deu ligam estó desvelat per la soa autora, Tresià Pambrun.

Lo Congrès permanent de la lenga occitana que contribuí dab dus quilomètres, un a Pau, tà la region Navèra Aquitània, e un aute a Tarba, tà la region Occitània, e que tienó un taulèr a l’arribada entà muishar au public viengut nombrós los utís numerics existents en lenga occitana.

Que felicitam l’associacion Ligams, atau com tots los benevòles qui i contribuín, d’aquesta beròja escaduda populara, entad aquera sensibilizacion hestiva a la lenga e a la cultura nostas cap a un public qui desconeish hòrt sovent lo riquèr deu país on demoran.

E podosse estene’s aquesta iniciativa cap a un territòri mei anar mei bèth a cada edicion !

 D’escotar : Messatge de Teresa Pambrun : https://www.youtube.com/watch?v=AvNPb4ReuTw  ; https://www.youtube.com/watch?v=wXJmkGxbae8 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*