Salinèlas es un vilajòt a ras de Somèire. Son nom cascalheja coma una invocacion de poesia.
Es benlèu per aquò que s’i trapan las edicions L’Aucèu Libre que n’avèm ja dich tot lo ben que s’ameritan. Es plan mercés a n’elas que s’i debanan los Encontres das Literaturas e Creaccion d’Òc Actualas que vos recomandam. Venguts un temps fòrt de la vida culturala occitana, ofrisson ongan dau 24 au 26 de junh un fum de plasers a res non còsta ! Nòstra lenga que patís totas las misèrias possiblas dins son quite país, garda pasmens una dinamica literària bèla qu’es una font regalanta jamai agotada. Aculhits per la Comuna dins lo Castèu e l’Iranjariá, e sostenguts activament pel CIRDÒC e la Region, aquestes Encontres son l’escasença de descobèrtas e d’escambis amb d’autors e d’afecionats dels mots, que parlaràn de l’edicion d’òc e das Revistas que son indispensablas a la vida literària. De segur i aurà de discutidas saberudas e de comunicacions ensenharèlas coma la que farà l’Evelina Fraisse de « La novèla en occitan de Provença a Gasconha ». Emai los grands ancians seràn pas oblidats. L’amira d’una sièsta poetica acompanhada a la arpa fa gaug, coma las proesas d’una navigacion poetica. E, de nuòch, jos las estelas de Salinèlas, Lo Còr de la Plana en concèrt. La bèutat fa lo Jòi !