Lo Collectiu Occitan, que revendica la preséncia de l’occitan dins la television publica, s’amassarà lo 7 d’octòbre que ven, divendres, a Tolosa, per fin de tornar lançar la campanha que son lèma es “Volèm l’occitan a la television regionala”. La crida la fa totjorn lo Collectiu Occitan, qu’amassa un desenat de movements occitanistas dont Convergéncia Occitana, l’IEO, lo CRÈO, la Confederacion Calandreta, lo Partit Occitan, EELV Occitània, País Nòstre, lo Partit de la Nacion Occitana, Bastir Occitània e Macarèl. La reünion se tendrà a l’Ostal d’Occitània, Carrièra de Malcosinat, a 18h.
Après qualques ans de mobilizacion per la preséncia de l’occitan cada jorn a la television publica, lo Collectiu Occitan reüssiguèt a aduire l’afar fins a l’Assemblada Nacionala francesa. Ara, lo govèrn francés prepara una granda reforma de l’audiovisual e es un bon moment per se far ausir.
De soslinhar que 618 comunas votèron una mocion que sosteniá las demandas del Collectiu Occitan per la preséncia jornadièra de l’occitan a la television publica. En mai d’aquò, los departaments d’Aude e de la Nauta Garona votèron una mocion parièra del temps que lo departament de Gard mandava una letra de sosten al ministre de la cultura.
Una ora e quart per mes
A l’ora d’ara, la television publica francesa non prepausa d’emissions en occitan que 17 oras per an, çò que fa una mejana d’una hora e quart per mes. Aquela preséncia es infima se la comparam amb la preséncia de las lengas autoctònas a las televisions dels estats vesins coma Espanha, Soïssa o Belgica.
Info / Jornalet