| Amigas, amics aicí sèm ! |
| Dempuòi que se’n parlava jos las platanas, digús vesiá pas res venir e de la launa a las garrigas nautas, de Serrana a Sant Clar o au Mont Sant Lop, d’unes, dins los enbasses, s’èran daissar anar a parlar de « bosigaulada » dins lo temps que d’autres, enrasigats prigond dins lo calcari, repapiavan mai a quauques mascacariás de las fadas… |
| Saique s’enganavan pas d’a fons, qu’aquela letra la voldriam tant amusarèla qu’encantarèla, la mai complèta que se pòsca per vos donar una idèia setmanièira dau rebaladís menat aicí en tèrra d’Erau per lo trentenat d’associacions que sèm. |
| Mas es pas tot. |
| En seguissent los dralhòus enflorits de l’internet, descobriretz lèu que la letra es pas que la part vesedoira dau site novèl qu’estrenam. Sos ligams vos menaràn sus lo blòg novèl E… rau ! que pòrta d’ara endavant la paraula nòstra e l’evenemencial d’aquí amb sempre los meteisses collaborators, las cronicas costumièiras, e tot un fum de causas novèlas, e tot, e tot… |
| La letra, lo blòg, emai tanben un espaci dedicat a cada cercle que siái un pauc a la ramassa per lo rensenhar. (me mandèssetz entresenhas e fòtos de bona qualitat, m’ajudariatz) |
| Traparetz tanben una Botiga desmaterializada qu’i poiretz faire caufar la carta blava per crompar libres vertadièrs. (un trentenat de nòstras edicions per començar) |
| Perdonaretz las imperfeccions e los trastejaments de la començança, -un ase que fa çò que pòt es pas una missanta bèstia- mancaretz pas de pelfinar l’òbra en me disent çò que va pas, e me petaçarai se pòde per o metre en musica. |
| Ane, zo ! Prendretz una oliva? => https://ieo-erau.com/ |
| Es pas que la debuta ! |
| Domenge IEO -ERAU |