Lo Collectiu Occitan a decidit de tornar far campanha per “l’occitan cada jorn a la television regionala” amb dos aperitius revendicatius lo 23 de novembre a 12h davant lo sit de France 3 a Montpelhièr e a Tolosa. A mai, lo collectiu vòl tanben aviar una campanha de mobilizacion per amassar de dons e contribucions per Jornalet.
Jol lèma “Volèm l’occitan a la television” aurà luòc dimècres 23 de novembre a miègjorn d’aperitius revendicatius davant los sètis de France 3 de Montpelhièr e de Tolosa. La crida la fa totjorn lo Collectiu Occitan, que reünís un desenat de movements occitanistas dont Convergéncia Occitana, l’IEO, lo CRÈO, la Confederacion Calandreta, lo Partit Occitan, EELV Occitània, País Nòstre, lo Partit de la Nacion Occitana, Bastir Occitània e Macarèl.
Un bon moment per se far ausir
Après qualques ans de mobilizacion per la preséncia de l’occitan cada jorn a la television publica, lo Collectiu Occitan reüssiguèt a aduire l’afar fins a l’Assemblada Nacionala francesa. Ara, lo govèrn francés prepara una granda reforma de l’audiovisual e es un bon moment per se far ausir.
De soslinhar que 618 comunas votèron una mocion que sosteniá las demandas del Collectiu Occitan per la preséncia jornadièra de l’occitan a la television publica. En mai d’aquò, los departaments d’Aude e de la Nauta Garona votèron una mocion parièra del temps que lo departament de Gard mandava una letra de sosten al ministre de la cultura.
Una ora e quart per mes
A l’ora d’ara, la television publica francesa non prepausa d’emissions en occitan que 17 oras per an, çò que fa una mejana d’una hora e quart per mes. Aquela preséncia es infima se la comparam amb la preséncia de las lengas autoctònas a las televisions dels estats vesins coma Espanha, Soïssa o Belgica.
Ajudar Jornalet
Lo Collectiu, a mai, a decidit de se mobilizar per ajudar Jornalet “pr’amor qu’es una aisina fondamentala per la dignitat de la lenga, qu’es panoccitana e qu’es ja un forum”, çò explica Joan-Loís Blenet, copresident de Calandreta en tot remarcar qu’aqueste jornal es pas sostengut per cap de collectivitat del costat nòrd dels Pirenèus.
De fach, aqueste jornal patís un excès de trabalh e un finançament fòrça magre e per aquelas rasons ven de far una crida al sosten financièr e intellectual que lo Collectiu Occitan s’i es engatjat.
Dins aquela draia, avèm tanben establit d’acòrdis de cooperacion amb Ràdio Occitània, Ràdio Niça Pantais e Lo Diari.
Info / Jornalet