Del 9 a l’11 de mai de 2024, lo movement Calandreta tendrà son 32n congrès a Espaliu (Causse Comtal). Environ 400 personas vengudas de per tot lo país s’amassaràn per tres jornadas d’escambi e de reflexion.
Lo tèma central d’aquela edicion serà la cultura, un dels pilars fondamentals de la carta dels establiments Calandreta, als costats de la lenga, de la pedagogia e de l’associacion per far escòla. Per divèrses obradors de cant, de dança, de musica e de contes, los participants auràn l’escasença de dinamizar lors escambis e d’explorar las practicas culturalas pròprias a cadun.
Jol títol “Fasèm cultura!”, lo congrès aficha una ambicion clara: demostrar que la cultura es pas simplament un concèpte abstrach reservat als especialistas, mas un motor essencial de l’identitat collectiva e del sens del territòri. Coma se practica al quotidian dins las classas, las mesas en situacion e la cooperacion seràn al còr dels debats, ofrissent a cada establiment l’oportunitat de venir un actor màger dins la valorizacion e la transmission de las especificitats culturalas localas.
Se reapropriar o s’apropriar una cultura locala per la far reviure, es, segon los organizaires, un acte essencial que contribuís a afortir lo malhum social e uman. Lo congrès promet aital d’èsser una escasença unica de celebrar e d’afortir los ligams a l’entorn de la riquesa culturala d’Occitània.
D’escòlas associativas en occitan
Las escòlas Calandreta, escampilhadas per tota Occitània, son d’escòlas laïcas e associativas qu’an un contracte amb l’estat, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. La relacion entre los professors e las familhas es fòrça estrecha e los parents se pòdon engatjar dins lo projècte fins ont vòlgan. E mai, cada calandreta a una estrecha relacion amb son entorn immediat, e aital la coneissença de la realitat pròcha e l’engatjament dels escolans amb l’entorn son plan elevats.
A l’ora d’ara, Occitània compren 62 escòlas primàrias Calandreta e mai 4 collègis Calandreta a Pau, Tolosa, Montpelhièr e Marauçan (Besierés). Info / Jornalet .