Amb sos 80 ans d’istòria e sa preséncia sus tot lo territòri occitan, l’Institut d’Estudis Occitans (IEO) vòl tornar jogar un ròtle màger dins l’accion per la lenga occitana. Dempuèi sa darrièra assemblada generala, tenguda a Bordèu del 9 a l’11 de mai, i a un nòu conselh d’administracion e un nòu burèu. Patrici Pojada serà desenant lo nòu president de l’IEO.
A l’eissida de son eleccion, Pojada desvelèt las orientacions principalas de son accion dins un mot adreiçat als aderents. Ne destacam los ponches clau:
- Continuïtat e renovelament: lo burèu elegit vòl assegurar una transicion serena e federar las energias a l’entorn d’un projècte collectiu.
- Vision panoccitana: l’IEO deu representar tot lo domeni occitan, de las Valadas a l’Atlantic, e de la Val d’Aran a Lemosin.
- Tres foncions estrategicas reafirmadas: l’IEO coma institut d’estudis e difusaire de recèrca, coma actor de transmission de la lenga e coma associacion de revendicacion e de pression.
- Organizacion en “pòls estructurants”: cada foncion del burèu serà ligada a una comission tematica dobèrta als sòcis volontaris.
- Relançar lo ligam amb las seccions: son previstas de reünions regionalas per escambiar, coordenar e bastir d’accions comunas.
- Un bilanç collectiu en 2026: l’AG non electiva serà l’escasença de far lo ponch e d’organizar, se possible, un congrès sus l’occitan.
Pojada clava son mot amb una crida a l’implicacion de totes: “Es una òbra collectiva que volèm menar per una lenga, la nòstra lenga que s’amerita totes los nòstres esfòrces.”
Nòu Conselh d’Administracion e un burèu renovelat
L’IEO tenguèt sa darrièra Assemblada Generala del 9 al 11 de mai passats a Bordèu. Aquela escasença foguèt marcada per l’eleccion d’un nòu Conselh d’Administracion e, posteriorament, lo 27 de mai, s’elegiguèt, per mejan d’un mòde d’escrutinh electronic anonimat, d’un burèu encargat de menar a bon tèrme las missions de l’associacion.
Un Conselh d’Administracion renovelat
La còla elegida a l’AG de Bordèu es constituida de dètz e sèt membres: Cecila Chapduèlh, Daidier Mir, Domenge Château-Arnaud, Eliana Tourtet, Eric Fraj, Evelina Houlès, Fabrici Bernissan, Isabel Mejean, Jan-Mari Caunet, Jaumelina Arnaud, Josiana Marty-Daunis, Maëlle Dupon, Maria-Àngel Lagarda, Marina Crouzilhac, Patrici Pojada, Roman Brunel e Tederic Cahuzac.
A aquestes s’ajusta los membres de drech que representan las quatre seccions regionalas de l’IEO.
Un burèu estructurat per foncions tematicas
Lo nòu burèu elegit es presidit per Patrici Pojada. L’acompanhan dins la direccion de l’IEO:
- Eliana Tourtet, vicepresidenta encargada de las relacions exterioras
- Evalina Houlès, vicepresidenta per la transmission e socializacion de la lenga
- Domenge Château-Arnaud, vicepresident per la recèrca e l’infrastructura informatica
- Roman Brunel, vicepresident per la difusion culturala e artistica
- Josiana Marty-Daunis, vicepresidenta per l’edicion e la difusion (IDÈCO)
- Eric Fraj, secretari general
- Daidier Mir, secretari adjonch
- Isabèla Mejean, clavaira
- Maria-Àngel Lagarda, clavaira adjoncha.
Cada membre del burèu serà encargat d’animar un pòl estructurant, o comission tematica, que permetrà de mobilizar los sòcis de totas las seccions volontaris per trabalhar sus de questions estrategicas.
Un projècte collectiu amb ambicion realista
Dins son primièr mot coma president, Patrici Pojada soslinha la consciéncia de la responsabilitat e de las espèras ligadas al nòu mandat: “Ni revolucion, ni miracle, simplament la volontat de trabalhar.” Son projècte vòl restablir la posicion centrala de l’IEO dins lo païsatge occitan, a l’entorn de sas tres missions fondamentalas: la recèrca e la difusion del saber, la transmission e socializacion de la lenga, e l’accion militanta e revendicativa.
La còla prevei una fasa d’estructuracion progressiva, basada sus l’escota de las seccions, amb l’organizacion de reünions regionalas e la volontat d’implicar los aderents dins la definicion de las prioritats. Un bilanç d’estapa es previst per l’Assemblada Generala de 2026.