Una manifestacion occitana se tendrà deman dissabte, 7 de febrièr de 2026, a 11 oras a Carcassona, davant lo Conselh departamental d’Aude (mapa), per defendre lo mantenement de l’apelacion istorica de Castèls Catars. I aurà de presas de paraulas e d’intervencions musicalas dels grops Òc e A Capella, e de Gerard Zuchetto.

L’acamp es organizat al mièg d’una viva polemica ligada al projècte de cambiar lo nom d’aqueles sits emblematics de Lengadòc jol nom de Fortalesas Reialas, dins l’encastre de lor candidatura al patrimòni mondial de l’UNÈSCO.

Per las institucions que pòrtan la candidatura a l’UNÈSCO, lo tèrme “Castèls Catars” seriá istoricament impròpri, pr’amor que fòrça fortalesas foguèron bastidas o transformadas pel poder reial après la Crosada. Mas aquela lectura es contestada per de nombrosas associacions e movements occitanistas, qu’i veson una inversion memoriala. De Montsegur a Pèirapertusa, en passant per Querbús, Tèrmes, Puèglaurenç o Las Tors, aqueles castèls pòrtan totes la memòria d’un meteis drama: al sègle XIII, la Crosada contra los Albigeses e l’Inquisicion menèron a de masèls e de persecucions que marquèron prigondament lo país occitan. Montsegur ne demòra lo simbòl mai conegut, amb mai de 200 personas cremadas vivas en 1244.

Lo collectiu País Nòstre, a l’origina de la mobilizacion, denóncia una volontat d’escafar la memòria de las victimas en privilegiant lo raconte dels opressors.

Una peticion en linha per gardar lo nom istoric de Castèls Catars a ja recampat mai de 6500 signaturas, dont fòrça movements de l’espaci occitan e catalan.

Pels organizaires de la protèsta, delà lo debat terminologic, es lo raconte de l’istòria e la dignitat de la memòria occitana que son en jòc.

Info / JORNALET