Festenal Mai que Mai ( Colombièras d’0rb dins Erau )

randoyeux.jpgE s’anàvetz faire una virada dins los cantons nauts d’Erau a la fin d’aqueste mes de mai : un brave rendètz-vos occitan es de retorn : lo festenal Mai que Mai ! D’activitats multiplas e variadas vos i espèran dins un ambient convivial e festiu. Poiretz èsser espectator, mas tanben actor.

La mai granda part de la programacion (https://pascaletheron.wixsite.com/maiquemai ) se ten a Colombièras d’Òrb.

Ldimècres 25 de mai, podètz prene part a un estagi de contes, puèi a una charradissa sus las femnas d’aicí e dançar en serada amb Bodegam Bal. L’endeman, dijòus de l’Ascension, passejada-espectacle de matin, abans un concèrt d’Albada a 18h30 e balèti amb P’Tit Bal de la Lune que se tendràn a Sant-Martin de l’Arçon.

Divendres 27, de vèspre, vos poiretz metre a la clarineta o caminar en cèrca dels babaus. Un balèti-aperitiu seguirà abans un novèl balèti en serada amb Patin Couffin e Loubelya.

Lo dissabte 28, auretz una brava causida : talhièr de laütariá, passejada pels òrts, iniciacion a las danças tradicionalas, estagi de borrèias, teatre per totes amb una creacion de la Fabrica Salvatja : Lo Vira-vira de las sasons. A 7 oras del ser, serà la debuta de la granda Nuèit de la dança animada per Versus, Flor de Zinc, Pollen, Chai, Caresse, Mar e Montanha (l’union de l’aubòi e de la bodega), Les Griottes e la Companhiá Le Coin de la Bulle.

E lo festenal Mai que Mai se perseguirà en junh. Lo dissabte 4 de junh a Premian, las femnas occitanas seràn mesas a l’onor amb : mòstra de fotografias de Coralia Lamoureux, projeccion de quatre cort-metratges sus las agricultriças de la contrada puèi del documentari Femmes de la terre, un conte musical La cabra e lo bodegaire, un mercat de nuèit de produccions e artesanat locals. Una animacion musicala clavarà la manifestacion : serà assegurada per l’Escòla de Bodega e Le bal sauvage.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*