L’estat francés demanda al Tribunal Administratiu d’anullar lo reglament municipal que reconeis lo drech dels conselhièrs de s’exprimir en catalan al conselh municipal a condicion que lors intervencions e documents se reviren al francés. Lo cònsol màger, Nicolas Garcia, a confirmat que la prefectura dels Pirenèus Orientals aviá denonciat la comuna: “Anarem al jutjament e ganharem! La vila d’Elna assignada davant un jutge per aver permés de legir los actes oficials tanben en catalan. Paura Republica Francesa”, çò a dich Garcia sus Twitter.
En abril passat, Elna venguèt la primièra comuna de Catalonha Nòrd a inclure dins lo reglament municipal lo drech de presentar sas deliberacions e de s’exprimir en catalan al conselh municipal. L’iniciativa la promoguèt lo cònsol màger, Nicolas Garcia, membre del Partit Comunista. Los conselhièrs municipals de l’oposicion de drecha votèron contra. “Elna defend doncas tot son patrimòni, catedrala, clastras, maternitat, barris e… la lenga e la cultura catalanas”, çò precisava Garcia en tot soslinhar que s’agissiá de la primièra comuna del departament qu’o fasiá oficialament.
Qualques meses abans, l’adjonch al cònsol, Pere Manzanares, aviá ja fach una intervencion al conselh municipal en catalan que faguèt als conselhièrs de l’oposicion, indignats, abandonar la sesilha. Aquestes denoncièron lo fach al prefècte dels Pirenèus Orientals, que mandèt una letra a la comuna en precisant que l’emplec del catalan èra pas permés. Alavetz, la comuna demandèt l’avís d’una jurista qu’assegurèt que lo prefècte aviá tòrt. La comuna envièt la responsa de la jurista al prefècte que, fin finala, donèt rason al cònsol màger.
Info / Jornalet .