Manifestèron pel catalan davant la prefectura de Perpinhan ièr dimècres, après que lo Tribunal Administratiu de Montpelhièr aguèt decidit la velha d’enebir l’usatge del catalan dins los conselhs municipals de las comunas nòrd-catalanas d’Elna, Els Banys, Portvendres, Tarerac e Sant Andreu de Sureda. Los manifestants seguissián la crida del Collectiu 2 d’abril qu’aviá lo sosten d’Òmnium e del Conselh de la Republica.
Los manifestants considèran que cal, forçadament, que lo catalan venga lenga oficiala en Catalonha Nòrd per n’assegurar lo mantenement. “Lo rei absoludista Loís XIV interdiguèt l’usatge oficial de la lenga catalana lo 2 d’abril de 1700. Fa 323 ans…”, çò recòrda lo Collectiu 2 d’Abril en tot assegurar qu’aquela “enebicion es totjorn en vigor; es estada mantenguda per de monarquias, d’empèris e de republicas”.
“Feblesa espantanta” de la Republica Francesa
Lo cònsol màger d’Elna, Nicolas Garcia, disiá dins una entrevista sus Vilaweb que“la Republica Francesa, e, en tot cas, sa justícia, presenta un imatge de feblesa espantanta”. Per Garcia, “aquela senténcia vòl dire que la Republica se sent menaçada pel fach que se parle primièr en catalan e puèi en francés. Aquò, dins un endrech de l’estat francés ont la lenga istorica es lo catalan, e mai siá a l’ora d’ara la mens parlada. Nos i acostumam, tanben amb çò de la lei de las retiradas, que Macron pòt pas quitament sortir per carrièras. La Republica Francesa se mòstra fragila. Se nosautres podèm far perilhar la granda Republica Francesa, que vendrà aquesta d’aicí a gaire?” Info / JORNALET