Lo collectiu Gardarem l’Estivada se recampèron al quiòsc del jardin public de Rodés per actar la creacion de lor associacion dins una jornada revendicativa e festiva a l’encòp qu’a per tòca de far renàisser l’Estivada. Lo collectiu se ditz convencut que l’Estivada pòrta “las valors umanistas que presam e una vision d’una cultura plurala d’avenidor”. De membres d’EELV e d’elegits de Rodés Ciutadan èran sus plaça. “L’Estivada es un ben d’interès public que cal servar per defendre nòstras lengas regionalas”, çò diguèt la conselhièra municipala d’oposicion Sarah Vidal a La Dépêche.
Après la creacion de l’associacion, i aguèt un afichatge en vila per anonciar lo forum ciutadan e festiu organizat a Rodés en octòbre per chifrar a la creacion d’un novèl festenal occitan, e aital relançar l’Estivada.
Seguiguèt un picnic festiu e partejat, un balèti en scèna dobèrta e la projeccion dels filmes creats per Dètz TV dins qualques edicions del festenal interregional de las culturas occitanas.
La transformacion del festenal occitanista en un eveniment mainstream dich F’estivada e completament desoccitanizat a fach reagir los aimadors de l’Estivada dins una peticion en linha qu’amassa environ 5500 signaturas. Jornalet .