CONGRES DE CALANDRETA A QUILHAN ( 29 de Mai al 1r de JUNH )

https://www.envieabeziers.info/images/10/27-calandreta_logo2.jpgLo congrès de Calandreta d’ongan se presenta coma fòrça especial: dins lo quadre del 40n anniversari del movement d’escòlas immersivas en occitan e a un moment ont, pel primièr còp, i a de calandrons de la mairala fins al bachelierat, de la pichona seccion a la terminala. L’eveniment se tendrà al domeni de l’Espinet, a Quilhan (Rasés) del 29 de mai al 1r de junh e se prevei la participacion d’environ 400 personas.

La tematica del congrès virarà ongan a l’entorn de la pedagogia, qu’es la clau de l’accion de las escòlas associativas occitanas qu’an quitament reüssit a bastir una veritabla “pedagogia Calandreta”.

Dimècres 29 de mai, lo congrès començarà per la “jornada pedagogica”, considerada coma lo recampament pus important d’ensenhaires d’occitan. Los 30 e 31 de mai veiràn trabalhar ensems los associatius e los ensenhaires dins cinc obradors tematics e quatre comissions qu’elaboraràn de proposicions d’accion e d’organizacion. Enfin, lo dissabte 1r de junh serà consagrat a l’assemblada generala de la Confederacion Calandreta.

En mai d’aquò, la partida culturala de l’eveniment se tendrà a l’Espaci Catar de Quilhan lo divendres 31 de mai amb un concèrt del grop Cocanha. Aquel meteis jorn, a 18h30, es previst un rescontre amb lo cònsol màger e los elegits de la comuna.

INFO / LO JORNALET

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*