Un encontre insolit : Liszt-Jansemin
Lo 20 de setembre de 1844, Franz Liszt venguèt donar un recital al teatre Moncorny d’Agen, que precediguèt lo teatre Ducourneau, convidat per son amic Jansemin.
Aquel concèrt donat abans que Liszt partiguèsse per Espanha, demorèt mitic dins los annals ageneses.
Gràcias a l’associacion culturala occitana Agenés Tèrra Occitana, sa magia va tornar viure en vestits d’epòca lo dimenge 19 de setembre 2021 a 3 oras del vespre al teatre Ducourneau dins l’encastre de las Jornadas del Patrimòni. De fach, se tracha, amb lo sosten de la vila d’Agen d’onorar le patrimòni agenés sul plan lingüistic e cultural.
Dins aquel encastre, aquel espectacle ofèrt per Agenés Tèrra Occitana, lo teatre Ducourneau e la vila d’Agen serà gratuit mas la reservacion es obligatòria en telefonar al 05 53 66 26 60.
Lo passa sanitari serà demandat a l’entrada del teatre.
Un programa subre-bèl ricament illustrat vos serà propausat al prètz modic de 2 €
La primièra partida d’aquel espectacle serà consacrada a Jansemin dins son temps amb animacion musicala pels musicians e cantaires de la «companhiá Viratge» d’Agen e amb Philippe Bonneu al piano, e lecturas d’extrachs de las òbras de Jansemin per Joan-Pèire Alari e lor revirada en francés desfilarà simultanèament sus un ecran.
En segonda partida, Christian Moulié legirà d’extrachs d’un tèxt de Jacques Clouché anonciant la venguda de Liszt a ‘Gen.
Lo pianista agenés, Fabien Prou, tornarà jogar las pèças del programa causit per Franz Liszt per son concèrt.
Christian Moulié cantarà Faribolo Pastouro, extrach de Françouneto, la romança de Jansemin sus laquala Franz Liszt aviá improvisat.
Dins una restitucion d’un eveniment istoric, Joan-Pèire Alari, jogant lo ròtle de Jansemin, intervendrà dempuèi la lòtja del teatre a esquèrra de la scèna a la fin de l’espectacle en getant des coronas de laurièr sus la scèna e en declamant en occitan una òda a Franz Liszt dont la revirada en francés serà disponibla sul programa.
Amb aquel espectacle, Agenés Tèrra Occitana onòra lo poèta occitan, Jansemin, que rend Agen fièr e que a un espaci dedicat al Musèu de las Bèlas Arts e un dels pianistas e musicians mai grands de tots los temps, Franz Liszt.
Per Agenés Tèrra Occitana
Joan-Pèire Alari, secretari