Lo filme Un pont au-dessus de l’océan (Un pont subre l’ocean), del realizaire occitan Francis Fourcou, se pòt ara crompar en DVD, çò rapòrta ÒcTèle dins son compte d’Instagram.
Malgrat lo títol en francés, Un pont au-dessus de l’océan es un longmetratge de 90 minutas en diversas lengas, dont l’occitan, qu’explica lo rescontre d’una cantadora occitana amb lo pòble osage en Oklahoma, ont descobrís la lenga renaissenta dels osages, l’istòria tragica d’aquel pòble, la cultura dels indians de las planuras e lo necessari mestritge de lor destin. Puèi, es una poetessa osage que vesita Occitània e descobrís las lenga e cultura nòstras que se baton per subreviure. Es alavetz que trapa l’istòria de 3 osages perduts dos ans en Euròpa qu’arribèron a Montalban en 1829, e la solidaritat dels carcinòls que los ajudèron a tornar en Oklahoma. D’aquel fach naisseriá cent ans pus tard l’associacion Oklahoma-Occitània qu’organiza d’escambis culturals.
Martin Scorsese
Camin fasent, lo filme rescontra lo cap Standing Bear, Montsegur, la memòria de Wounded Knee, e mai Martin Scorsese, que tanben presentèt en salas un filme que met en scèna la violéncia absoluda patida pels pòbles originaris de l’America del Nòrd. Lo filme d’Scorsese es entitolat Killers of the Flower Moon, ten de nombroses actors osages e los famoses Robert De Niro e Leonardo Di Caprio, e arribèt als ecrans de l’estat francés en decembre de 2022.
Los osages son un pòble de lenga hoka-sioux. Lor nom, “osage”, ven del biais francés de prononciar wažáže (aigas mejanas). A l’ora d’ara, los osages se dison eles meteisses Ni Okašką, (lo Pòble de las Aigas Mejanas).
Per mai d’entresenhas, podètz vesitar lo sit web del filme unpontaudessusdelocean-lefilm.fr