Querbús: mobilizacion contra l’esfaçament de la memòria dels castèls catars
La protesta denóncia lo remplaçament de l’apelacion tradicionala per l’expression «fortalesas reialas» dins la candidatura dels sits al patrimòni mondial de l’UNÈSCO
Tèxte legit
Un vintenat de militants occitanistas se manifestèron dissabte passat al castèl de Querbús, dins la comuna de Cucunhan (Corbièras), per protestar contra lo cambiament de nom dels tradicionals «castèls catars» en «fortalesas reialas de Lengadòc», apelacion adoptada dins lo quadre de la candidatura dels sits al patrimòni mondial de l’UNÈSCO. Los participants pogèron fins al castèl en brandissuent de bandièras occitanas e denoncièron çò que considèran coma un esfaçament de la memòria istorica del país.
La mobilizacion foguèt organizada la velha de la session del comitat del patrimòni mondial de l’UNÈSCO, qu’examina la candidatura dels sèt monuments concernits: Montsegur, Querbús, Pèirapertusa, Tèrmes, Puèglaurenç, Las Tors e la Ciutat de Carcassona. Lo cambiament d’apelacion foguèt justificat pels promotors del dorsièr amb la volontat de privilegiar una denominacion jutjada mai rigorosa sul plan istoric, en rapòrt amb las fortificacions bastidas o transformadas pel poder reial francés après la Crosada.
Pasmens, per las associacions occitanistas e los promotors de la manifestacion, abandonar lo nom de «castèls catars» representa fòrça mai qu’una question terminologica. Estiman que la novèla apelacion invisibiliza la memòria de la repression menada al sègle XIII contra lo catarisme e contra lo país occitan en general. «Renomenar los castèls catars en fortalesas reialas torna glorificar los opressors e escafar la memòria de las victimas», çò asseguran los organizaires, dont País Nòstre e Bastir Occitània.
En parallèl, la peticion lançada sus Change.org per manténer la denominacion tradicionala demòra activa e a ja recampat près de 9000 signaturas, çò que mòstra que la polemica demòra plan viva delà los cercles militants.
La decision definitiva de l’UNÈSCO sus l’inscripcion d’aqueles monuments al patrimòni mondial es esperada dins los jorns que venon. Mentretant, lo debat sul biais de nomenar aqueles castèls contunha de pausar una question mai larga: cossí transmetre la memòria istorica de luòcs ont s’entrecrosan patrimòni arquitectural, identitat occitana e remembrança d’una Crosada que marca totjorn l’istòria del país.