« Occitània se tròba dins una situacion d’urgéncia nacionala dins los domenis cultural, educatiu, lingüistic, economic, social e environamental. Nos cal una operacion politica de salvament que siá transversala, dobèrta, plurala e de cap de partit. Las eleccions municipalas de 2020 son una bona ocasion per demostrar que l’occitanisme politic existís e que vòl far de politica. Mas aquí totas las energias son necessàrias e es important que totes i participem.
Al començament de 2014 saludàvem lo movement politic occitanista amassat a l’entorn de Bastir. Cresiam qu’èra un fenomèn interessant e encoratjant, e o cresèm totjorn. Se volèm avançar dins los domenis cultural, educatiu, lingüistic, economic, social e environamental, devèm far de politica dins las institucions publicas.
Ara ven de se lançar una crida per que l’occitanisme siá present a las eleccions municipalas de 2020 dins l’estat francés. Vòlon, abans tot, analisar l’experiéncia de 2014 amb Bastir e “crear una coordenacion que permeta una preséncia visibla e eficaça de l’occitanisme a aquelas eleccions”. Aqueste còp, o vòlon far en prenent un pauc mai de temps que çò que se faguèt en 2014 e en aprofechar l’experiéncia passada.
La còla de Jornalet saludam aquela iniciativa. Cresèm que cal aprofechar l’escasença de tornar bastir un movement dobèrt. La transversalitat, la pluralitat e l’activisme al marge dels partits es quicòm de positiu per atraire de gents que benlèu jamai non farián de politica activa, e sustot per far trabalhar ensems de personas o de collectius alonhats o opausats qu’ajan lo denominator comun de se batre per la recuperacion de la lenga, de la cultura e de la consciéncia occitanas.
Benlèu lo projècte que ne sortirà qualques unes lo trobarem minimalista. Mas, totun, cresi que caldrà mai prepausar e agir que non pas criticar. Dins una situacion d’urgéncia nacionala cal l’unitat de totes, en daissant las diferéncias de costat, e en trabalhant totes ensems per aténher, dins un relambi d’un quart de sègle, una situacion de consciéncia nacionala mai pròcha de la qu’an los escoceses, los còrses o los catalans. Esperem que l’acamp de dissabte que ven a Tolosa installe las basas del futur occitanisme politic de la vocacion majoritària. »
. LO JORNALET